SUV nag-dive sa flyover: 2 kritikal

CAVITE, Philippines — Kapwa mga nasa kritikal na kondisyon at mga inoobserbahan sa pagamutan ang dalawang sakay ng isang Toyota Veluz na nahulog sa Flyover kamakalawa sa Sta. Rosa flyover sa Brgy. Sta Rosa 2, Noveleta, dito sa lalawigan.

Kinilala ang mga biktima na sina Omar Magarang, 38-anyos, may asawa, driver at Naim Limbona, 28, kapwa ng Brgy. Cabuco, Trece Martirez City Cavite.

Sa ulat ng pulisya, sakay ang mga biktima ng Toyota Veluz na may plate no. DBH8822 at bumabagtas sa nasabing Hiway.

Napag-alaman na may kabilisan umano ang patakbo ng mga biktima habang bumabagtas sila sa nasabing flyover bunsod upang mawalan umano ng kontrol ang driver sa manibela at diretsong sumalpok sa steel pole bago tuluyang nalaglag sa flyover.

Wasak ang sasakyan ng mga biktima at naipit pa sila sa loob nito kung kaya inabot ng mahigit sa kalahating oras bago sila naialis at naitakbo sa pagamutan.