Tindahan pinasok ng 3: Trader niratrat, patay!

CAVITE, Philippines —  Patay ang isang negosyante nang pasukin sa kanyang tindahan at pagbabarilin ng ‘di bababa sa tatlong  lalaki na armado ng maiiksing baril kamakalawa sa Bacoor City.

Hindi na umabot pang buhay sa pagamutan ang biktima na kinilala lang sa alyas “Kurt”, nasa hustong gulang, residente ng Bacoor City.

Sa imbestigasyon ng pulisya, nasa loob ng tindahan nito ang biktima nang dumating ang mga armadong kalalakihan at tuluy-tuloy na pumasok sa loob.

Nagkaroon pa diumano ng komosyon sa pagitan ng mga suspek at biktima hanggang sa barilin ng isa sa mga suspek ang huli bago mabilis na nagsitakas.

Nagtamo ang mister ng tama ng bala sa likurang bahagi ng kanyang katawan. Agad naman siyang naitakbo ng awtoridad sa Asia Medical Center subalit hindi na naisalba pa ng mga doktor.

Inaalam pa ng pulisya ang motibo sa krimen.