Ex-mayor, ex-administrator ng Calumpit, Bulacan kinasuhan sa Ombudsman
MALOLOS CITY, Bulacan, Philippines — Kasong katiwalian ang isinampa sa Ombudsman ng isang private citizen sa dating alkalde at municipal administrator ng bayan ng Calumpit, dito sa lalawigan.
Sa 19-pahinang reklamo ng isang pribadong mamamayan ng Calumpit na ayaw ipabanggit ang pangalan, kasong administratibo at kriminal ang isinampa nito laban kay dating Calumpit Mayor Jesse De Jesus at dating Municipal Administrator Myleen Pangan.
Nakasaad sa reklamo na lumabag umano sa Sections 3(e) at 3(j) ng Republic Act #3019 o Anti-Graft and Corrupt Practices Act ang dalawang dating opisyal matapos umano silang mag-isyu ng waiver/certification na hindi na kailangang kumuha ng business at mayors permit para sa taong 2022 ang contractor ng Malolos-Clark Expressway Project. Nang mga panahong iyon, si De Jesus ang kasalukuyang mayor ng nasabing bayan at si Pangan ang municipal administrator.
Ayon sa reklamo, pinayagan nina De Jesus at Pangan sa pamamagitan ng waiver na huwag nang kumuha ng permit ang Hyundai Engineering & Construction Co., Ltd at Dong-a Geological Engineering Co. (HMDJV), joint venture ng Megawide Construction Corp. na siyang contractor ng Malolos-Clark Expressway Project.
Dahil umano sa ginawa ng dating opisyal, umabot sa P8,005,726.55 ang nawala sa kabang yaman ng munisipyo ng Calumpit na dapat sana ay nabayaran ng nasabing contractor para sa taong 2020 hanggang 2022.
Sinasabi rin sa reklamo na dahil wala na sa serbisyo ang dalawang opisyal at hindi na maaaring dismissal ang ipataw sa kanila, iginiit ng complainant na makansela ang eligibility, mapawalang halaga ang kanilang retirement benefits at kung maaari ay panghabambuhay na madiskwalipika na makapagtrabaho sa gobyerno at ipagbawal na kumuha ng civil service examinations.
- Latest
