Quezon province government muling nakakuha ng ‘Unmodified Opinion’ sa COA
![Quezon province government muling nakakuha ng �Unmodified Opinion� sa COA](https://media.philstar.com/photos/2024/07/30/3_2024-07-30_21-52-09.jpg)
MANILA, Philippines — Dahil sa pagsusumikap na maisulong ang malinis at mabuting pamamahala, muling nakatanggap ang pamahalaang Panlalawigan ng Quezon ng Unmodified Opinion remarks mula sa Commission on Audit (COA).
Ito na ang ikalawang pagkakataon na nakakuha ang lalawigan ng unmodified opinion remarks mula sa nasabing ahensiya sa ilalim ng pamumuno ni Governor Helen Tan.
Matatandaan na noong Hunyo 2023 ay nakatangap ang Pamahalaang Panlalawigan ng Quezon para naman sa financial statement ng taong 2022.
“The Auditor rendered an Unmodified Opinion on the fairness of the presentation financial statements as of December 31,2023 of the Provincial government of Quezon,” nakasaad sa liham ng COA.
Sinabi ng COA na malaking bagay ang nasabing audit opinion, sapagkat ito’y naglalarawan ng tapat at responsableng pamamahala sa limitadong pondo na ginagamit ng Pamahalaang Panlalawigan upang makapaghatid ng iba’t ibang serbisyo na ang pangunahing layunin ay maiangat ang antas ng buhay at mapunan ang mga pangangailangan ng bawat mamamayang Quezonian.
Nanatili naman ang paninindigan ni Gov. Tan na sa kanyang pamumuno ay magpapatuloy ang pagbibigay ng tunay, maayos, at maasahang serbisyo sa hangarin na ito’y magbubunga tungo sa mas maaunlad na lalawigan ng Quezon.
Ang audit report ay inihanda ng Audit team na binubuo nina Chritopher Perez, OIC-Supervising Auditor at Audit Team Leader, in concurrent capacity, Jess Esquinas, Mas Reena Lynne Pnohermo at Fernando Barretto, Audit team members.
- Latest