MALOLOS CITY, Bulacan, Philippines —Dalawang hinihinalang tulak ng ipinagbabawal na droga kabilang ang isang lady trader ang naaresto ng Bulacan Police sa isinagawang drug bust operation kamakalawa ng gabi sa Brgy. Wawa, Balagtas, Bulacan.
Sa report na nakarating kay Bulacan Police Director Relly Arnedo, kinilala ang dalawang suspek sa alyas na “Jako”, 23-anyos, lalaking construction worker at alyas “Tin”, 38-anyos na babaeng negosyante.
Naaresto ang dalawang suspek ng Special Drug Enforcement Unit ng Balagtas Municipal Police Station na nagsagawa ng buy-bust operation.
Nabawi mula sa dalawang suspek ang 100 gramo ng hinihinalang shabu na may street value na P680,000.
Nahaharap ang mga naarestong suspek sa kasong paglabag sa Sec 5 at 11 ng RA 9165 o Comprehensive Dangerous Drugs Act of 2002.
Ayon kay Cil Arnedo ang mga operasyong ito ay nagpapakita ng matatag na dedikasyon ng mga ahensyang nagpapatupad ng batas sa lalawigan ng Bulacan upang labanan ang ipinagbabawal na kalakalan ng droga.