Amnestiya sa rehistro ng kolorum na sasakyan, inilunsad sa BARMM
COTABATO CITY, Philippines — Sa kauna-unahang pagkakataon, makakapag-rehistro na ang mga taga-Bangsamoro region ng mga sasakyang pampasahero na may problema ang mga papeles o mga “colorum” sa pamamagitan ng isang registration amnesty program ng autonomous regional government.
Ito ay ibinalita mismo nitong Miyerkules ni Bangsamoro Transportation and Communications Minister Paisalin Tago, kasabay ng paghikayat sa mga may-ari ng mga sasakyang “colorum” sa anim na probinsya ng autonomous region na makipag-ugnayan sa mga kawani ng Bangsamoro Land Transportation Office upang magabayan kung paano maka-benepisyo sa naturang programa.
Katuwang ng Ministry of Transportation and Communications-Bangsamoro Autonomous Region in Muslim Mindanao ang tanggapan ni Brig. Gen. Prexy Tanggawohn, director ng Police Regional Office-Bangsamoro Autonomous Region in Muslim Mindanao, at Regional Highway Patrol Unit sa rehiyon, sa pamumuno ni Police Lt. Col. Christian Dela Cruz, sa pagtiyak, kung kinakailangan, na hindi nakaw ang mga sasakyang ipapa-rehistro sa pamamagitan ng naturang programa.
Ayon kay Tago, nagsimula nitong Martes ang vehicle amnesty registration program ng MoTC-BARMM at matatapos sa Biyernes, May 10, at hindi mahal ang mga bayarin para sa bawat sasakyang pasado sa screening ng Bangsamoro LTO.
Ayon kay Bangsamoro LTO Director Razul Gayak, handa na silang magproseso ng applications para sa nais maka-benepisyo ng MoTC-BARMM passenger vehicle registration amnesty.
- Latest
