Obrero sumemplang sa motor, utas

LUCBAN, Quezon, Philippines — Nabasag ang bungo at namatay noon din ang isang mister makaraang sumemplang ang minamanehong motorsiklo dahil sa pagbangga sa isang kalso sa gitna ng highway na sakop ng Barangay Manasa sa bayang ito, kamakalawa ng umaga.

Kinilala ng pulisya ang biktima na si Erwin Dator, 45, may-asawa, utility worker at nakatira sa Garcinia Subd. Barangay Kilib Lucban, Quezon.

Base sa imbestigasyon, sakay ng isang Honda Wave motorcycle ang biktima at binabagtas ang Lucban-Tayabas road, alas-6:00 ng umaga nang mabangga nito ang isang kalso sa gitna ng kalye.

Nang sumemplang ang motorsiklo ng biktima ay bumagok sa sementadong kalye ang ulo nito na bagama’t may suot na helmet ay nagtamo pa rin ng matinding kapinsalaan sanhi upang agad itong malagutan ng hininga.