2 todas sa ambush sa Sultan Kudarat
COTABATO CITY, Philippines — Patay ang dalawang namimili ng mga nare-recycle na mga plastic na kasangkapan matapos silang tambangan at pagbabarilin nitong hapon ng Huwebes sa isang bahagi ng highway sa Palimbang, Sultan Kudarat.
Sa ulat ng Palimbang Municipal Police Station nitong Byernes, hindi pa nakikilala kung sino ang mga salarin sa pananambang kina Eduardo Cabucos Jr. at kasamang si Ricky Gaso sa isang liblib na bahagi ng highway sa Barangay Baliango na nagsanhi sa kanilang agarang kamatayan.
Parehong taga-Kiamba sa probinsya ng Sarangani ang mga biktima, at magkasama sa pamimili ng mga scrap metals at mga plastic na kanilang pinagbibili sa isang negosyante sa kanilang bayan.
Lumalabas sa imbestigasyon na pauwi na sa kanilang bayan ang dalawang biktima sakay ng motor trike nang pagbabarilin ng mga armadong nakaabang sa gilid ng highway na nagresulta sa kanilang agarang kamatayan.
Wala pang linaw sa mga imbestigador kung sino ang mga responsable sa pagpatay kina Cabucos at Gaso.
- Latest
