2 bahay inararo ng payloader: 1 patay, 2 sugatan

COTABATO CITY , Philippines —  Isa ang naiulat na nasawi habang dalawa pa katao kabilang ang isang bata ang malubhang nasuga­tan nang araruhin ng isang payloader na nawalan ng preno ang kanilang mga tahanan sa Iligan City nitong Biyernes.

Naganap ang aksidente sa Purok Mansulahog sa Barangay Rogongon sa Iligan City hapon ng Biyernes, May 19, 2023.

Ayon sa lokal na pulis­ya, hindi na umabot nang buhay sa pagamutan si Carmelita Onotan Pandana nang mahagip ng malalaking gulong ng payloader na minamaneho ni Sherwin Caballero.

Wasak ang dalawang barung-barong na pagmamay-ari ng mga magkapit-bahay na sina Freddie Arado at Solo Piawan.

Nasa loob ng naturang mga tahanan ang nasa­wing si Pandana at ang mga sugatang si Melca Villamea at isang 2-taong gulang na bata, na pawang nasa pagamutan na.