Hepe ng PDEG Central Visayas, sinibak

6 tauhan dawit sa illegal drugs

MANILA, Philippines — Tinanggal na rin sa puwesto ang hepe ng PNP-Drug Enforcement Group (PDEG) Central Visayas na si Police Lieutenant Colonel Lymel John Pasquin, matapos makasuhan ang anim na tauhan nito dahil sa pagkakasangkot sa illegal na droga.

Ayon kay PNP Spokesperson Police Col. Jean Fajardo, ang hakbang ay alinsunod sa doktrina ng command responsibility.

Si Col. Pasquin ay pinalitan sa pwesto ni Police Major Jeff Erwin Balindan.

Matatandaang anim na pulis ng PDEG Special Operations Unit (SOU) Visayas ang kinasuhan ng National Bureau of Investigation (NBI) sa Ombudsman-Visayas, nitong Biyernes, dahil umano sa pagkidnap at pag-torture sa dalawang indibiduwal na napagkamalang sangkot sa iligal na droga, sa Minglanilla, Cebu noong Marso, 2023.

Kaugnay nito, sinabi ni PNP chief General Benjamin Acorda, Jr. na pinag-aaralan na ng pamunuan ng PNP ang pagbuwag sa lahat ng SOU, at pag-centralize sa PDEG ng implementasyon ng Case Operational Plan (COPLAN), para mas mabantayan ng mga opisyal ang kilos ng kanilang mga tauhan.