Bagitong pulis, 2 pa timbog sa buy-bust!

MANILA, Philippines — Tatlong pinaghihinalaang notoryus na drug pusher kabilang ang isang aktibong pulis ang nasakote ng mga awtoridad matapos silang masamsaman ng mahigit P400,000 halaga ng shabu sa isina­gawang buy-bust operation sa Cotabato City, kamakalawa ng gabi.

Kinilala ang mga na­arestong suspect na sina P/Patrolman Jassim Aking, nakatalaga sa Police Regional Office-Bangsamoro Autonomuos Region in Muslim Min­danao (PRO-BARMM), Sindatu Macmud at Fatima Usman.

Sa ulat ng PRO-BARMM, dakong alas-6:45 ng gabi nang magsa­gawa ng buy-bust ope­ration ng pinagsanib na elemento ng pulisya at Philippine Drug Enforcement Agency-BARMM (PDEA-BARMM) sa San Isidro St., Barangay Rosary Heights 10 ng nasabing lungsod.

Isang undercover agent ng PDEA ang nakipag-transaksyon sa mga suspect para makabili ng  340,000 halaga ng shabu.

Matapos na magkapalitan ng illegal na droga at buy-bust money ay saka inihudyat ang pagdakip sa mga suspect na hindi na nakapalag nang palibutan ng mga ahente ng PDEA at mga pulis.

Bukod sa nabatid na halaga ng shabu, ilang sachet pa ng nasabing illegal na droga ang nakuha sa multicab na dala ng mga suspect.