Barko pinalubog ng malalaking alon: 6 nasagip

QUEZON, Quezon, Philippines — Nailigtas sa kapahamakan ang anim na katao na sakay ng isang cargo ship sa Lamon Bay sa Brgy. Cagbalugo, Quezon, sa lalawigang ito matapos lumubog dahil sa malalaking alon kahapon ng umaga.

Batay sa ulat, nasa maayos nang kondisyon ang mga biktimang hindi muna pinangalanan.

Ayon sa Quezon DRRMO, nahirapan ang MV Rome Rhona na may lamang LPG tanks dahil sa malalakas na alon dulot ng masamang panahon at lumubog ito may 4 na kilometro pa lamang ang layo mula sa pantalan.

Dakong alas-8:00 ng umaga nang umalis ang bangka lulan ang 3 tripulante at 3 pasahero patungo sa bayan ng Gumaca nang masalubong nila ang malalakas at malalaking alon.