Parak dedo sa suwag ng Montero

MANILA, Philippines — Dedo ang isang pulis matapos na bumangga ang minamaneho niyang motorsiklo sa isang kotse sa national highway sa Brgy. Cabalanggan, Bantay, Ilocos Sur. kahapon ng madaling araw.

Kinilala ng Bantay Municipal Police Station ang nasawi na si Patrolman Shandrex Lopez y Marinduque, 27, walang-asawa, residente ng Purok 4 Quirino, Naguilian, Isabela, at nakadestino sa PIT Ilocos Sur RIU1.

Nakilala naman ang driver ng Mitsubishi Montero na si Bryan Camit y Calumpit, 35, residente ng Brgy. 7 Alejo, Malasig, Vintar, Ilocos Norte.

Base sa CCTV foo­tage na nakuha mula sa command center ng Bantay, Ilocos Sur, ang motorsiklo ay papuntang silangang direksyon samantalang ang Montero naman ay papuntang kanlurang direksyon.

Pagdating sa lugar, ay kumaliwa ang Montero para pumasok sa Marsha’s Delicasies na nasa southern part ng highway na nagresulta sa banggaan ng dalawang sasakyan.

Ang biktima na dri­ver ng Yamaha NMAX na nagtamo ng head injury ay agad na dinala sa Metro Vigan Hospital ng mga rumes­pondeng PNP personnel pero idineklarang dead-on-arrival.