Lalaki tinodas ng kapitbahay na nasilawan ng flashlight

ESCALANTE CITY, Negros Occidental, Philippines — Pinatay­ sa saksak ng isang lasing na lalaki ang kanyang kapitbahay matapos masilawan ng flashlight ng una,kamakalawa ng gabi sa lungsod na ito.

Ang nasawi ay kinilalang si Salvador Lamoste, 33-anyos habang naka-hospital arrest naman ang suspek na kinilalang si Tammy Abayon, 35-anyos, at kapwa residente sa Sitio Bunyag, Purok Kalu­bihan, Barangay Magsaysay, Escalante City.

Sa imbestigasyon ni P/Staff Sergeant Jerry Kim Ughayon, ng Escalante City Police Station, bago naganap ang krimen, alas-7:00 ng gabi sa labas ng bahay ng biktima ay narinig ni Lamoste na malakas ang kahol ng kanyang aso kaya lumabas ito ng bahay at sinilip kung may tao gamit ang flashlight.

Naitutok nito ang flashlight kay Abayon na ikinagalit ng huli hanggang sa pinagsasaksak sa iba’t ibang parte ng katawan. Kahit na may tama si Lamoste ay kumuha pa ito ng itak sa kanilang kusina at tinaga si Abayon na tinamaan sa katawan.

Nag-agawan ng patalim ang dalawa hanggang sa tumakbo si Abayon habang dinala sa ospital si Lamoste, subalit sa daan pa lamang ay nalagutan na ito ng hininga. Nabatid na dati na nang may alitan sina Lamoste at Abayon.Inihahanda na ang kasong isasampa laban sa huli.