1 patay, 1 sugatan sa pagpuslit ng kontrabando
MANILA, Philippines — Isa ang patay habang isa sugatan nang maka- engkuwentro ng mga pulis ang dalawang lalaki na magpupuslit ng kontrabando, kamakalawa ng hapon sa Pigcawayan, Cotabato.
Kinilala ang nasawing suspek na si Bhan Mangcog Ali, 40, habang nasugatan ang kasamang si Ali Tahir Musa, 53, kapwa residente sa Brgy. Poblacion, Pagalungan, Maguindanao.
Batay sa pagsisiyasat, nangyari ang engkwentro sa pagitan ng Pigcawayan Municipal Police Station at mga suspek na nagtangka umanong magpuslit ng mga kontrabando sa P.Palma area, alas-5:45 ng hapon, sa bahagi ng Upper Baguer, Pigcawayan, Cotabato.
Nagsagawa ng police operation ang mga otoridad matapos makatanggap ng impormasyon hinggil sa pagdaan ng isang sasakyan na mayroong kargang kontrabando sa bahagi ng Upper Baguer.
Pinahinto ng mga pulis ang sasakyan ng mga suspek,subalit hindi huminto ang mga ito bagkus ay pinagbabaril ang mga pulis sa checkpoint.
Dito na gumanti ng putok ang mga pulis at tinamaan ang dalawang suspek na kung saan ay dead-on-arrival sa ospital si Ali habang sugatan si Musa.
Narekober ang 9 na kahon ng Fort at Modern cigarettes na nagkakahalaga ng P135,000, isang unit ng Colt Cal. 45 kasama ang magazine na mayroong 6 na piraso ng live ammunitions, 2 maliliit na pakete na hinihinalang shabu, isang Toyota Avanza, isang fire cartridge case ng .45 Caliber Pistol, at P11,000.
- Latest
