Security ng magkalabang mayoral candidates nagbarilan: 24 arestado
MANILA, Philippines — Matapos ang naganap na barilan ng mga aides ng dalawang mayoralty candidates sa Ilocos Sur, sumiklab din ang kahalintulad na karahasan sa Nueva Ecija na ikinaaresto ng 24 katao kabilang ang limang sugatan, kamakalawa ng gabi.
Sa isinagawang virtual meeting kahapon, agad nilinaw ni PNP Spokesperson Police Col. Jean Fajardo na ang pangyayari sa Purok Gulod, Brgy. Concepcion, General Tinio, Nueva Ecija kung saan sangkot ang mga tauhan ng magkalabang mayoral candidates ay maituturing na “isolated case” lamang, at inaasahan ng PNP na magiging maayos at tahimik ang magaganap na eleksyon ngayong Mayo 9.
Batay sa ulat, ang mga nadakip ay pawang security personnel nila incumbent General Tinio Mayor Isidro Pajarillaga at kalaban sa pagka-alkalde na si Virgilio Bote.
Sa nasabing bilang ng inaresto, 19 dito ay mula sa kampo ni Mayor Pajarillaga habang ang limang nasugatan ay mula sa kampo ni Bote.
Nakuha sa mga dinakip ang iba’t ibang kalibre ng baril tulad ng 5 M-16 rifles; isang 12 guage shotgun, 15 na kalibre ng baril at mahigit sa 200 rounds ng bala mula sa ibat-ibang kalibre.
Samantala, limang sports utiliy vehicle (SUV) naman na tadtad ng bala ang natagpuan sa pinangyarihan ng barilan.
Sinampahan na ng mga kasong frustrated murder at paglabag sa Omnibus Election Code (gun ban) ang mga nadakip na suspek.
- Latest
