7 bayan apektado ng volcanic activity ng Taal
MANILA, Philippines — Pitong bayan sa lalawigan ng Batangas ang apektado ng volcanic activity ng Taal Volcano, ayon sa National Disaster Risk Reduction and Management Council (NDRRMC) kahapon.
Inihayag ni NDRRMC Spokesman Mark Timbal na ang mga apektadong bayan ay ang Agoncillo, Balete, Cuenca, Laurel, Lemery, Talisay at San Luis ng naturang lalawigan.
Sinabi rin ni Timbal na tuluy-tuloy pa rin ang paglilikas ng mga awtoridad at local government units (LGUs) sa mga apektadong residente lalo na sa mga nasa high-risk areas.
Umabot na aniya sa 3,771 katao o 1,142 pamilya ang namamalagi ngayon sa may 17 na kabuuang evacuation centers sa Batangas habang nasa 265 pamilya o 1,203 indibiduwal ang lumikas sa kanilang mga kaanak.
Tuluy-tuloy din aniya ang pagbibigay ng LGUs ng mga family food packs sa mga evacuees habang nakaantabay ang supply naman sa Regional Disaster Council at National Disaster Council.
Tiniyak ni Timbal na wala nang mga tao sa mismong volcano island samantalang nasa “high-risk areas” pa rin ang limang barangay sa Bilibinwang, Banyaga, eastern sector ng Bugaan East, Boso-boso at Gulod.
- Latest
