Zambales Vice Gov tinamaan ng COVID-19

IBA, Zambales, Philippines — Inanunsiyo ni Zambales Vice Governor Jay Khonghun na nagpositibo siya sa COVID-19 matapos lumabas ang resulta ng kanyang RT PCR test kamakalawa.

Sa kanyang facebook post, sinabi ng bise ­gobernador na nakakaramdam siya ng sunud-sunod na pag-ubo, sipon, pabalik-balik na lagnat, pananakit ng katawan at lalamunan.

Ginawa naman umano ni Khonghun ang lahat ng pag-iingat, subalit tinamaan pa rin.

Tiniyak ni Khonghun na patuloy ang kanyang tanggapan sa pagbibigay ng serbisyo sa mga ­taga-Zambales at Olongapo.

Muling nagpaalala si Khonghun sa publiko na sundin ang health protocols at  magpabakuna sa lalong madaling panahon.