Barangay chairman itinumba sa Nueva Ecija

MANILA, Philippines — Patay ang isang brgy. chairman makaraang pagbabarilin ng hindi pa nakilalang armadong salarin sa Brgy. Nazareth, Gen. Tinio, Nueva Ecija nitong Biyernes.

Ang biktimang kinilalang si Amante Powec, 57-anyos, incumbent chairman sa Brgy. Palale ng bayang ito ay idineklarang dead-on-arrival sa Medicare Community Hospital sanhi ng mga tinamong tama ng bala sa kanyang dibdib.

Sa ulat ng Nueva Ecija Police, naganap ang krimen sa bisinidad ng Sitio Payung-Payong, Brgy. Nazareth, bandang alas-11:10 ng tanghali. Kasalukuyang sakay sa kanyang tricycle ang tserman nang lapitan ng gunman at pagbabarilin nang sunud-sunod.

Bunga nito, duguang bumulagta ang opisyal sa kanyang tricycle habang mabilis namang tumakas ang suspect patungo sa hindi pa malamang destinasyon.

Nagawa pang maisugod ang biktima sa pagamutan ng mga sumaklolong residente sa lugar pero nabigo nang maisalba ang buhay nito.

Isinasailalim pa ng mga awtoridad sa masusing imbestigasyon ang kasong ito upang matukoy ang motibo ng krimen.— Christian Ryan Sta. Ana