2 notoryus na ‘tulak’ arestado
TALAVERA, Nueva Ecija, Philippines — Arestado ang dalawang sinasabing notoryus na tulak ng droga makaraang mahulog sa inilatag na magkahiwalay na drug buy-bust operations ng pulisya sa bayang ito, kamakalawa ng gabi.
Sa ulat ni P/Lt. Col. Heryl Bruno, hepe ng pulisya rito, nakilala ang mga suspek na sina Gerardo Olea alyas “Gerry”, 45, may-asawa ng Brgy. Dimasalang Sur, dito at Eustacio Mesina Jr. alyas “Gudo”, 35, may-asawa, ng Brgy. Sangitan West, Cabanatuan City.
Ayon sa ulat, unang naaresto ng Talavera Police at Provincial Intelligence Unit (PIU) ang suspek na si Olea sa Brgy. Gulod, Talavera, alas-7:45 ng gabi.
Nakuha kay Olea na kabilang umano sa drug watchlist ang 3-plastic sachet ng shabu na may timbang na 5.60 gramo at halagang P38,080.
Sumunod namang naaresto ang dayong suspek na si Mesina sa Brgy. San Miguel na Munti, dakong alas-9:15 ng gabi.
Nasamsam sa suspek ang 12-plastic sachet ng hinihinalang shabu na may timbang na 6.20 gramo at nagkakahalaga ng P42,160.
- Latest
