Mister binoga sa ulo habang nakaupo

RIZAL, Philippines — Patay ang isang mister nang barilin ng ‘di kilalang salarin habang nakaupo sa loob ng isang compound sa Antipolo City kahapon ng madaling araw.

Isang tama ng bala sa ulo ang ikinamatay ng biktimang si Antonio Villanueva, nasa hustong gulang, may asawa at residente ng Brgy. Cupang, Antipolo.

Batay sa ulat, dakong alas-12:30 ng madaling araw nang maganap ang krimen sa loob ng Dimson Compound, Purok 2, Zone 8, sa Brgy. Cupang, Antipolo City.

Nakaupo lamang umano sa lugar ang biktima at nagpapahangin nang bigla na lang sumulpot ang suspek at agad siyang pinaputukan ng ‘di batid na kalibre ng baril sa ulo. Nang matiyak na napuruhan ang target, mabilis na tumakas ang salarin.