Deputy chief of police todas sa tandem

MANILA, Philippines — Patay ang isang deputy chief of police matapos na tambangan at pagbabarilin ng riding-in-tandem sa national highway ng Brgy. Tapon Norte sa San Jose, Negros Oriental nitong Martes ng gabi.

 Idineklarang dead-on-arrival sa Siliman Medical Center ang biktimang si Police Executive Master Sergeant Roldan Esmajer, 47-anyos, deputy chief ng San Jose Municipal Police Station (MPS) sanhi ng mga tinamong tama ng bala sa tiyan, dibdib at balikat.

 Ayon kay Police Col. Julian Entoma, director ng Negros Oriental Provincial Police Office, galing umano sa isang police operation sakay ng kanyang motorsiklo ang biktima nang maisipan nitong umuwi muna sa kanilang tahanan sa halip na bumalik sa kanilang himpilan.

Lingid sa kaalaman ng biktima habang binabagtas nito ang highway ay binuntutan siya ng dalawang salarin na magkaangkas sa motorsiklo.

Pagsapit sa lugar, agad dinikitan ng mga suspek saka pinaputukan ng angkas ng tatlong beses ang opisyal dakong alas-7 ng gabi na kanyang ikinabulagta.