74-anyos dedo sa sagasa

LEGAZPI CITY, Albay, Philippines — Nagkalasug-lasog ang katawan ng isang 74-anyos na lola matapos banggain ng rumaragasang motorsiklo sa kahabaan ng highway ng Purok-3, Brgy. Gaid, Dimasalang, Masbate kamakalawa ng umaga.

Sinubukan pang isugod ng mga residente sa Masbate Provincial Hospital pero hindi na umabot nang buhay si Nerluila Banda Lignes, ng nasabing barangay.

Sa ulat, dakong alas-7:30 ng umaga, patawid sana sa kalsada si Lignes pero sinalpok ng paparating at walang plakang motorsiklo na minamaneho ni Rolando Rosales Arroyo, 24-anyos,  ng Purok-1. Sa lakas ng pagkakabangga, tumilapon pa ng ilang metro ang matanda.

Duguang isinugod ang biktima sa ospital pero idineklarang dead-on-arrival. Arestado at sasampahan ng kasong reckless imprudence resulting in homicide ang suspek.