Mag-asawa, pamangkin at 1 pa timbog sa Droga
Cavite, Philippines — Ginawa nang family business ng isang mag-asawa at isa nilang pamangkin ang pagtutulak ng droga sa kanilang lugar at karatig bayan hanggang madakip sila ng pulisya sa isang buy bust operation kamakalawa ng gabi sa Barangay San Francisco, General Trias, Cavite.
Kinilala ni Police Supt. Paul Bometivo, hepe ng General Trias Police, ang mga suspek na sina Danilo Rosales, 38, may IR record sa pulisya; misis nito na si Marie Rose Rosales, 35, at pamangkin na si Reymond Fauni, 23, pawang mga residente ng Sitio Canatuan-2, Brgy. San Francisco, at ang runner at look out ng mga ito na si Michael Solis, 37.
Nabatid kay Bometivo na, alas 7:00 ng gabi, kasama niya ang mga miyembro ng DEU-Operatives nang ikasa nila ang Buy-Bust operation. Isa sa kanyang tauhan ang tumayong scorer at nakipag-deal sa mga suspek.
Agad itong inabutan ng mag-asawa kaya rito na dinakma ang mga suspek. Nabatid na ang runner at look out ng mga ito ay dati ng nakulong sa kaso ring drugs.
Nakuhanan ang mga ito ng 10 plastic sachet na naglalaman ng ’di pa mabilang na shabu at drug money.
- Latest
