2 bihag ng Abu, nasagip

MANILA, Philippines — Tumagal lang ng halos apat na oras ang isinagawang rescue operation ng tropa ng militar sa dalawang bihag na kamag-anak ng isang alkalde ng Sulu matapos dukitin ng mga bandidong Abu Sayyaf Group (ASG) sa bayan ng Talipao ng lalawigan, ayon sa opis­yal kahapon.

Kinilala ni Col. Gerry Besana, tagapagsalita ng AFP Western Mindanao Command ang mga pinala­yang hostage victim na sina Edelyn Tulawie, 27-anyos, half –sister ni Talipao Mayor Nebukadnezar Tulawie at ina nitong si Addang Tulawie, 57-taong gulang.

Batay sa report, ang da­lawa ay binihag ng 20 mga armadong tauhan ni Abu Sayyaf Sub-Commander Hatib Hajan Sawajaan matapos na sala­kayin ang taha­nan ng mga ito sa Brgy. Kan­daga, Talipa, bandang alas-2:20 ng hapon noong Miyerkules.

Ayon kay Besana, mata­pos na matanggap ang re­­port ay agad namang nagsagawa ng search and rescue ope­rations ang mga sundalo sa Brgy. Sinumaan at Brgy. Kagay kung saan huling naispatan ang dalawang bihag na ligtas na nasagip bandang alas-6:00 ng gabi.

Isinailalim naman ang mga biktima sa medical checkup at trauma debriefing sa Kuta Heneral Teodulfo Bautista Hospital sa Jolo, Sulu.