3-anyos pinatay sa bugbog ng ama

MANILA, Philippines — Kalunos-lunos ang sinapit na kamatayan ng isang 3-anyos na batang lalaki matapos na mapaslang sa pambubugbog ng sadista nitong ama sa Brgy. Maligaya, Rosario, Batangas nitong Biyernes.

Sa report ng Batangas Police, kinilala ni Calabarzon Police office Director P/Chief Supt. Guillermo Eleazar ang nasawing biktima na si Miko Alaro na idineklarang dead-on-arrival sa MVM Hospital sa Rosario, Batangas sanhi ng hematoma o malalalim na sugat at pamumuo ng dugo sa iba’t-ibang bahagi ng katawan.

Patuloy namang pi­naghahanap ang suspek na si John Ross Lumawang Alaro na mabilis na tumakas matapos ang pagpatay sa sariling anak na paslit at nahaharap ngayon sa kasong parricide.

Sa inisyal na ulat, napundi umano ang ama sa pag-iyak ng anak kung kaya napagdiskitahan nitong bugbugin at iumbag sa dingding. Tinantanan lamang ng suspek ang anak sa panggugulpi nang makitang hindi na gumagalaw ang huli habang duguan ang mukha at may matinding sugat sa ulo na kanyang ikinasawi.