Consultant ng mayor, inutas

TUGUEGARAO CITY, Cagayan, Philippines – Pinabulagta ang 70-anyos na consultant ng alkalde matapos itong pagbabarilin sa bisinidad ng quarry site ng munisipyo na kanyang pinamamahalaan sa Barangay Visitacion, bayan ng Sta. Ana, Cagayan kahapon.

Kinilala ni P/Chief Insp. Saturnino Soriano, hepe ng Sta. Ana PNP ang napatay na si Oscar Onate na tauhan ni Mayor Darwin Tobias sa nasabing bayan. ?

Sa inisyal na imbestigasyon ng pulisya, lumitaw na nag-uusap ang biktima at gunman sa quarry site nang bigla itong ratratin sa ulo.

Ayon kay Soriano, wala naman sa drug watchlist ang biktima subalit malimit ireklamo ng ilang gravel and sand dealers ang sinasabing pagkamaangas ng biktima sa pamamahala ng nasabing lugar.?

Narekober sa crime scene ang ilang basyo ng bala ng cal.45 pistol habang patuloy naman ang imbestigasyon.