Drug suspek tumba sa shootout

QUEZON, Philippines – Napatay ang 45-anyos na sinasabing drug suspek matapos itong makipagbarilan sa mga operatiba ng QPIB, PAIDSOTG at Lucena City PNP kahapon ng madaling araw sa Purok Bagong Sinag sa Barangay Cotta, Lucena City, Quezon. Sa ulat na nakarating kay P/Senior Supt. Roderick Armamento, QPPO acting provincial director, nakilala ang napaslang na si Jerry “Pugto” Causapin na sinasabing may nakapending kasong kriminal sa RTC Branch 55, Lucena City. Batay sa imbestigasyon, isinagawa ng mga awtoridad ang buy-bust operation subalit nakatunog si Causapin na pulis ang katransaksyon kaya tumakbo ito palayo. Gayunman, habang tumatakas ay pinaputukan ni Causapin ang mga pulis hanggang sa gantihan siya ng putok at tuluyang bumulagta. Narekober ang cal. 45 pistol, dalawang P500 marked money, at 12 plastic sachet ng shabu (20 gramo).