Mag-asawang trader, nilikida

NORTH COTABATO, Philippines – Patay ang mag-asawang negosyante makaraang pagbabarilin ng mga hindi kilalang lalaki sa 305-C, Barangay Palkan sa bayan ng Polomolok, South Cotabato kahapon ng umaga. Napuruhan sa ulo ang mag-asawang sina Raul Alitao, 54; at Ofelia Alitao, kapwa residente ng Koronadal Proper sa nasabing bayan. Base sa police report na nakarating kay P/Senior Insp. Herman Gabat, chief of police sa bayan ng Polomolok, nakita na lamang na nakahandusay ang mag-asawa ng mga taong dumaraan sa nasabing lugar bandang alas-5:30 kahapon ng umaga. Narekober sa crime scene ang motorsiklo ng mag-asawa at dalawang basyo ng bala ng cal. 45 pistol. Nabatid na nagtatrabaho ang mag-asawa sa poultry farm at nagmamay-ari rin ng niyugan sa kanilang lugar.