Barangay tanod, nilikida

TUGUEGARAO CITY, Cagayan, Philippines – Bulagta ang 35-anyos na barangay tanod habang kritikal naman ang dalawa nitong kasamahan makaraang ratratin ng mga hindi kilalang lalaki sa gilid ng kalsada sa Barangay Macate, bayan ng Diffun, Quirino kamakalawa ng gabi. Kinilala ang napatay na si Barangay Tanod Alex Brusal habang kritikal naman sa Quirino Provincial Medical Center sa bayan ng Cabarroguis sina Resty Valenzuela at Rolando Obrero. Ayon kay P/Insp. Bernard Sapiro, deputy chief ng Diffun PNP, nakaupong nagpapahinga sa gilid ng kalsada ang mga biktima nang pagbabarilin ng gunman.? Ayon kay Sapiro, hinabol pa ng killer ang sugatang biktima na nagtangkang tumakas subalit hindi rin ito nakaligtas. Kaswal na naglakad ang killer palayo matapos ang krimen. Narekober sa crime scene ang 13 basyo ng bala ng cal. 45 pistol.