Babae binigti sa sementeryo

MANILA, Philippines – Brutal na kamatayan ang sinapit ng 44-anyos na babae matapos itong bigtihin sa loob ng pampublikong sementeryo sa San Pablo City, Laguna, ayon sa ulat kahapon. Sa report ni P/Senior Supt. Ronnie Montejo, acting provincial director ng Laguna PNP na nakarating sa Camp Crame, Lunes ng umaga nang matagpuan ang bangkay ng biktimang si Felipa Alip Mendoza sa sementeryo sa Brgy. II-F. Ang biktima ay nagtamo ng malalim na sugat sa iba’t-ibang bahagi ng katawan nang madiskubre ng isang residente. Huling namataang buhay ang biktima noong Linggo ng umaga nang magpaalam sa kaniyang ka-live-in na lalabas lamang sandali at may mahalaga lamang itong aasikasuhin. Gayon pa man, nabigong makauwi ang biktima hanggang sa madiskubre ang bangkay nito kamakalawa ng umaga.