Sundalo ng PAF dedo sa encounter

BATANGAS, Philippines – Patay ang 30-anyos na sundalo ng Philippine Air Force matapos makasagupa ang mga rebeldeng New People’s Army sa liblib na bahagi ng Barangay Toong sa bayan ng Tuy, Batangas noong Lunes ng hapon. Kinilala ni P/Senior Insp. Eduardo Caraig, hepe ng Tuy PNP ang biktimang si A1C Cliff Arvin Alama na naka-assign sa 730th PAF Combat Group. Ayon sa police report, nagsasagawa ng combat patrol ang pangkat ni Alama nang makasagupa ang mga rebelde bandang alas-5 ng hapon. Tumagal ng ilang minuto ang putukan hanggang bumulagta si Alama habang nagsitakas naman ang grupo ng NPA. Patuloy naman ang hot pursuit operation ng mga awtoridad sa pagtugis sa rebelde patungo sa kabundukan.