Kinidnap na Army Sergeant pinalaya ng NPA rebels

MANILA, Philippines – Ilang oras bago ang pagsalubong sa Bagong Taon, pinalaya na ng mga rebeldeng New People’s Army (NPA) ang binihag nilang Army Sergeant sa isang lugar sa bayan ng Las Nieves, Agusan del Norte nitong Huwebes.

Kinilala ni Captain Joe Patrick Martinez, Spokesman ng Army’s 4th Infantry Division (ID), ang pinakawalang bihag na si Sergeant Adriano Bingil, miyembro ng Bayanihan team ng Army’s 26th Infantry Battalion (IB) na nakatalaga sa Brgy. Mahagsay, San Luis, Agusan del Sur.

Ang biktima ay binihag ng mga rebelde sa isinagawang illegal na checkpoint  matapos itong sumalakay sa Brgy.Mahagsay, San Luis noong Setyembre 19, 2015.

Lumilitaw naman sa imbestigasyon na binihag ang nasabing sundalo sa loob ng 3 at kalahating buwan dahilan sa aktibo ito sa Bayanihan program ng AFP o ang pagsusulong ng kaunlaran sa mga kanayunan na labis na tinututulan kaya sinasabotahe ng NPA rebels.