16-anyos kasambahay, nagbigti

MANILA, Philippines – Pinaniniwalaang desperado sa problemang pampamilya kaya kusang nagpasalubong kay kamatayan ang 16-anyos na kasambahay matapos itong magbigti sa bahay ng kanyang amo sa Barangay Tierra Alta, bayan ng Taal, Batangas kamakalawa. Kinilala ang nag-suicide na si Melody Laurente ng Bagong Ilaya sa bayan ng General Luna, Quezon at naninilbihan sa bahay ng kaniyang amo sa nasabing barangay. Sa ulat ng Batangas PNP na isinumite sa Camp Crame, dakong ala-1:15 ng  hapon nang madiskubre ang biktima na nakabitin sa kisame ng kusina ng bahay na pag-aari ni Harvey Villalon na pinagsisilbihan ng biktima. Nagawa pang maisugod sa Taal Polymedic Hospital ang biktima pero idineklarang patay habang patuloy naman ang imbestigasyon ng pulisya.