Sanggol patay matapos salpukin ng trak sa Zambo

MANILA, Philippines – Sa pagligtas sa buhay ng isang hayop ay naging kapalit nito ang buhay ng isang sanggol sa Zamboanga City.

Nasawi ang isang apat-na-buwang sanggol matapos iwasan ng motorsiklo ang tumatawid na iguana, ngunit sa kasamaang palad ay nasalpok naman sila ng trak sa Maria Clara Lobregat Highway sa Barangay Victoria bandang 8:25 ng umaga kahapon.

Ligtas ang mag-asawang lulan ng motor na sina Albert Torres, 32, at Angery Galia Casimiro, 30, ngunit patay ang kanilang anak na si Ashly Casimiro Torres na pawang mga residente ng Barangay Victoria.

Kusa namang sumuko ang driver ng trak na si Reneboy Quijano Carano 26, ng Cadiz City, Negros Occidental.

Naisugod pa sa ospital ang sanggol ngunit binawian din ito ng buhay habang ginagamot.

Nasawi rin naman ang iniwasang iguana matapos masagasaan din ng trak.