Military detachment hinaras ng NPA
MANILA, Philippines – Isang sundalo ang nasugatan habang minalas namang mapatay ang ka-live-in nito makaraang ratratin ng mga rebeldeng New People’s Army ang detachment ng militar sa bayan ng Jose Abad Santos, Davao del Sur kahapon ng madaling araw.
Kinilala ang sugatang sundalo na si M/Sgt Ruel Mahilum habang inaalam ang pagkakakilanlan ng ka-live-in nito.
Sa ulat ng Army’s regional command, naganap ang insidente sa himpilan ng Bravo Company ng 73rd Infantry Battalion ng Philippine Army sa Caburan Small, Jose Abad Santos dakong alas-4 ng madaling araw.
Sa inisyal na imbestigasyon, bigla na lamang pinaulanan ng bala ng mga rebelde ang nasabing detachment.
Sa kasagsagan ng pagpapaulan ng putok ay nasugatan si Mahilum habang minalas namang masapul ng tama ng bala ang kanyang ka-live-in.
Nagsasagawa na ng operations ang tropa ng militar laban sa grupo ng mga rebelde na sangkot sa marahas na pagsalakay sa nasabing detachment.
- Latest
