Barangay kagawad, nilikida

NORTH COTABATO, Philippines – Napatay ang beteranong barangay kagawad makaraang pagbabarilin ng di-kilalang lalaki sa Sitio Kamangahan, Barangay Ilustre sa Upper Roxas, bayan ng Pres. Roxas, North Cotabato kahapon ng madaling araw. Sa report na nakarating kay P/Chief Insp. Bernard Tayong, tagapagsalita ng Cotabato Police Provincial Office, kinilala ang biktima na si Kagawad Wendel Gasita ng nasabing Barangay. Lumilitaw sa imbestigasyon na hinihintay ng biktima na makauwi ang mga kalahok at mga manonood ng amateur singing contest kaugnay sa selebrasyon ng kanilang kapistahan nang lapitan at ratratin. Matatandaan na noong Biyernes lamang ng hapon (Setyembre 4), pinagbabaril din at napatay ang isang sub-contractor engineer sa nasabing bayan. Blanko pa rin ang pulisya sa magkahiwalay na pamamaslang sa nasabing lugar.