5-anyos swak sa kanal, patay

MANILA, Philippines - Patay ang limang taong gulang na batang lalaki makaraang mahulog sa kanal ng irigasyon habang naglalaro kamakalawa ng gabi sa bayan ng Nasugbu, Batangas. Sa ulat ng Batangas PNP na isinumite sa Camp Crame, ang  biktimang si Josh Samson ay natagpuan ng kanyang ama na si Alvin Samson habang nakalutang  at inaanod sa irrigation canal sa Brgy. Cogunan dakong alas-11 ng gabi. Huling nakitang buhay ang bata bandang alas-4 ng hapon habang nakikipaglaro sa kaniyang mga kaibigan sa nasabing lugar. Gayon pa man, hinanap ng kaniyang mga magulang ang biktima matapos itong hindi umuwi bago maghapunan. Halos matulala ang mga magulang ng bata ng lumutang ang katawan nito sa irrigation canal.