Mag-uutol patay sa sunog

TUGUEGARAO CITY, Cagayan, Philippines – Napaaga ang kamatayan ng magkakapatid na batang lalaki makaraang tupukin ng apoy ang kanilang kubo sa Barangay San Lorenzo, bayan ng Buguey, Cagayan kamakalawa. Ayon kay P/Senior Insp. Saturnino Soriano, hepe ng Buguey PNP, animo’y tustadong karne ng hayop at hindi na mamukhaan ang mga labi nina Ashley Umukit, 10; Elvin Umukit Jr., 3; at si Marco Umukit, 2. Ayon kay Soriano, iniwan ng mag-asawang Elvin at Jocelyn ang mga anak upang makipaglamay sa yumaong kaanak. Nabatid na hindi ganap na inapula ang baga sa kalan ng pamilya Umukit na siyang pinagmulan ng apoy. Tanging ang anak ng mag-asawa na sanggol na kanilang dinala sa burol ang nakaligtas, ayon kay Soriano.