Misis inutas ng 14-anyos dahil sa jacket
MANILA, Philippines - Napatay ang 29-anyos na misis na sinasabing tumangging isauli ang jacket na naiwan ng kanyang kapitbahay matapos itong saksakin sa Purok Riverside, Barangay Taruc sa bayan ng Remedios T. Lim, Zamboanga Sibugay kamakalawa ng tanghali.
Napuruhan sa leeg ang biktimang si Arlyn Lanot habang arestado naman ang suspek na itinago sa pangalang Rudy.
Sa police report na isinumite sa Camp Crame, sinabi ni P/Inspector Dahlan Samuddin, nagtungo ang suspek sa bahay ng biktima upang kunin ang naiwan nitong jacket na regalo lamang sa kaniya at may sentimental value.
Gayon pa man, tumanggi ang biktima na isauli ang jacket na nagustuhan nito kaya nagpumilit ang suspek na kunin ito pero sinampal pa ito ng biktima.
Dito na tuluyang sumiklab ang galit ng binatilyo kaya sandaling umalis at umuwi pero pagbalik ay may dalang bagong hasang itak na itinarak nito sa leeg ng misis.
Nagawa pang maisugod sa Ipil Doctors Hospital subalit namatay din ang biktima dahil sa malalim na saksak sa leeg.
Kasalukuyang nasa lokal na Municipal Social Welfare and Development ang suspek dahil sa pagiging menor-de-edad nito.
- Latest
