Mister dinedo sa droga

BULACAN, Philippines – Pinaniniwalaang onsehan sa droga ang isa sa motibo kaya pinatay ang 36-anyos na mister matapos itong ratratin ng  motorcycle-riding gunmen sa bisinidad ng paaralan sa Barangay Sabang, bayan ng Baliwag, Bulacan kahapon ng umaga. Labindalawang tama ng bala ng cal.45 pistol ang tumapos sa buhay ni Roy Gacusan ng Barangay Caingin sa bayan ng San Rafael, Bulacan. Sa imbestigasyon nina PO3 Maurice Cruz at PO3 Jesrael Yahwe Giron, pauwi na ang biktima mula sa paghahatid ng kanyang anak sa eskuwelahan nang harangin at pagbabarilin ng riding-in-tandem gunmen. Nakarekober sa crime scene ang 12-basyo ng bala ng cal. 45 pistol  habang patuloy naman ang pagsisiyasat.