Saksi sa massacre patay sa ambush

BATANGAS, Philippines – Pinagbabaril at napaslang ang pangunahing saksi sa karumaldumal na masaker dito sa lalawigan matapos tambangan ng hindi pa nakilalang armadong salarin sa lungsod ng Lipa kahapon ng madaling araw.

Kinilala ni P/ Inspector Cariza Matel, Lipa City Police Spokeperson ang biktimang si Alvin Avaro, 35, pandesal vendor, residente ng Villa de Lipa Subdivision, Brgy. Sabang, Lipa City.

Ayon sa report,  sakay si Avaro ng kanyang motorsiklo para magbenta ng pandesal sa loob ng City Park Subdivision sa Brgy. Sabang nang lapitan ito ng isang armadong suspek at paputukan ito ng baril bandang alas-5 ng umaga

Si Avaro ay isa sa dalawang pangunahing saksi sa naganap na masaker ng dalawang menor de edad na babae at ikinasugat ng isa pa sa Villa de Lipa Subdivision noong Oktubre 27, 2014.

Pinaniniwalaan namang may kinalaman sa pagtestigo ng biktima sa kaso ang krimen na ikinadakip ng nililitis na suspek.