Ina hinostage ng anak na adik

BULACAN, Philippines – Arestado ang lalaking lulong sa shabu matapos na i-hostage nito ang sariling ina sa loob ng kanilang bahay sa Brgy. Tungkong Mangga, San Jose Del Monte City, Bulacan kamakalawa ng gabi. Kasong kriminal ang kinakaharap ng suspek na si Joel Bueno, 40, habang sumailalim naman sa stress debriefing ang nanay na si Leticia Bueno, 61, biyuda at kapwa nakatira sa Diamond Crest Subdivision sa nasabing barangay. Sa ulat na nakarating kay P/Supt. Charlie Cabraddilla, lango sa droga ang suspek nang i-hostage nito ang sariling ina kaugnay sa nawawala niyang misis saka nagbantang susunugin ang kanilang bahay. Kaagad naman nakipagnegosasyon ang mga miyembro ng crisis management committee upang mapayapa ang suspek kung saan humingi ito ng sasakyan na gagawing gateaway vehicle. Habang pumapasok ang mag-ina sa sasakyan ay nakatiyempo si P/Insp.Sean Logronio ng Provincial Public Safety Company at mga tauhan nito na patagong lapitan at dakmain ang suspek.