Retiradong sundalo, itinumba

QUEZON, Philippines – Pinabulagta ang 48-anyos na retiradong sundalo ng Phil. Army matapos itong barilin ng di-kila­lang lalaki sa loob ng kanyang bahay kamakalawa ng gabi sa Sitio Baysong, Barangay Binay bayan ng San Narciso, Quezon. Isang tama ng bala ng cal. 45 pistol sa likurang bahagi ng ulo ang tumapos sa buhay ni Danilo Aquillano habang patuloy na nangangalap ng impormasyon ang pulisya sa pagkakailanlan ng gunman. Sa inisyal na imbestigasyon, lumilitaw na nanonood ng telebisyon ang biktima nang pumasok ang suspek buhat sa kusina ng bahay saka isinagawa ang krimen. Pinaniniwalaang may kaugnayan sa dating trabaho ng biktima ang motibo sa krimen.