Sadistang Fil-Am, kalaboso
BULACAN, Philippines – Kalaboso ang 40-anyos na Filipino-American matapos na ireklamo ng kanyang live-in partner ng pambubugbog at mga sadistang gawain sa Brgy. Sulucan, Bocaue, Bulacan, kahapon ng madaling araw.
Kaagad na kinasuhan ng R.A. 9262 (Violence Against Women and their Children) at Direct Assult ang suspek na si Christopher Stephen Iba at pansamantalang nakatira sa Brgy. Sulucan sa naturang bayan. Nagmistula namang nagmukhang punching bag ang mukha, tadtad ng pasa at galos ang iba’t-ibang bahagi ng katawan at hindi makalakad ang biktimang si Dalia Bravo, 29, live in partner ng suspek at residente rin ng naturang lugar.
Base sa imbestigasyon ni PO3 Dorina Camado ng WCCD ng Bocaue PNP dakong ala-1:30 ng madaling araw nang humingi ng tulong ang ama ng biktima na si Wilfredo Bravo, 55, hinggil sa nagaganap na pagmamaltrato ng suspek sa kanyang anak bukod pa sa winawasak nito pa ang mga personal nilang kagamitan.
Kaagad namang inimbitahan ng pulisya ang suspek sa himpilan ng PNP ngunit habang nagpapaliwanag sa kanya ang nagrespondeng si PO1 Azudeery Dela Cruz ay walang sabi -sabing sinuntok nito ng tatlong beses sa mukha ang pulis na naging dahilan upang tuluyang arestuhin ito saka sampahan ng kaukulang kaso. (Boy Cruz)
- Latest
