Staff ng ABS-CBN utas sa kuryente
BULACAN, Philippines - Napaaga ang salubong ni kamatayan sa 28-anyos na staff ng ABS-CBN network matapos na aksidenteng makuryente habang inaahon ang sasakyang nabalahaw sa Barangay Rueda, bayan ng Plaridel, Bulacan kamakalawa ng gabi.
Hindi na umabot ng buhay sa Bulacan Medical Center ang biktimang si Geric Anacia, setman, at nakatira sa Sitio Veterans, Brgy. Commonwealth sa Quezon City na nagtamo ng 2nd degree na pagkasunog.
Sa imbestigasyon nina SPO1 Merwin Lopez at PO1 George Ancheta, kasalukuyang nag-aayos ang biktima at iba pang crew para sa telebisyon production sa Purok 2 nang biglang mabalahaw ang kanilang service vehicle na Nissan Escapade (PAO-371) habang umaatras sa gilid ng kalsada.
Kaagad namang nagtulung-tulong ang mga crew kabilang ang biktima upang alisin sa pagkakabalahaw ang sasakyan nang biglang madulas ito pababa saka kumapit sa street light post.
Subalit biglang nangisay ang biktima matapos mahawakan nito ang talop na linya ng kuryente na nakakabit sa street light post.
- Latest
