64-anyos lola ginahasa ng adik

MANILA, Philippines - Hindi pinalagpas ng 35-anyos na adik sa bawal na droga ang biyudang lola makaraang paghahambalusin ito ng kahoy ay hinalay pa kamakalawa ng madaling araw sa Barangay Canuto Enerio, bayan ng Gutalac, Zamboanga del Norte. Ang biktimang itinago sa pangalang Lola Clara ay nagtamo ng mga sugat sa ulo at iba pang bahagi ng katawan habang arestado naman ng mga operatiba ng pulisya ang suspek na si Darwin Campilan, 35, ng nabanggit na barangay. Sa ulat na nakarating kay P/Ins­pector Dahlan Samuddin, PNP regional spokesman, galing ang matanda sa pangunguha ng panggatong sa kakahuyan nang harangin ng suspek at paghahampasin sa ulo saka hinila sa damuhan. Gayon pa man,  nanlaban ang matanda habang hinuhubaran pero pinagsusuntok pa siya nito saka isinagawa ang maitim na balak. Kasalukuyang humihimas ng rehas na bakal ang suspek na nahaharap sa kasong kriminal.