Rookie cop inutas ng titser na misis
MANILA, Philippines - Pinaniniwalaang matinding selos kaya pinagbabaril at napatay ang 36-anyos na bagitong pulis ng kanyang titser na misis sa boarding house kamakalawa ng tanghali sa Dipolog City, Zamboanga del Norte.
Naisugod sa Zamboanga del Norte Cooperative Hospital subalit idineklarang patay si PO1 Rustom Redoble dahil sa mga tama ng bala sa dibdib mula sa sariling baril na cal 9mm pistol.
Arestado naman at nahaharap sa kasong parricide ang suspek na si Maricel Gorrero Redoble, 33, guro sa Katipunan National High School sa bayan ng Katipunan.
Sa ulat na nakarating ay P/Inspector Dahlan Samuddin, PNP regional spokesman, naganap ang insidente sa loob ng Mirasol Pilapil Salaveria Boarding House na tinutuluyan ng suspek sa panulukan ng del Pilar at Bonifacio Street sa Barangay Estaka.
Ayon sa imbestigasyon, nagtungo sa boarding house ng kaniyang misis ang biktima kung saan ay nagkaroon ng mainitang pagtatalo ang mag-asawa.
Gayon pa man, habang namamahinga ang biktima sa kama ay biglang kinuha ng misis nito ang baril at pinaputukan ng sunud-sunod ang una.
Narekober ng mga tauhan ng Scene of the Crime Operatives (SOCO) ang baril na ginamit sa krimen at mga basyo ng bala.
Si PO1 Redoble ng Purok 4, Sta Isabel ay nakatalaga sa himpilan ng Dipolog City PNP.
- Latest
