Binata nalunod dahil sa nobya

BULACAN, Philippines - Nagmistulang pelikula nina Romeo and Juliet ang naganap na trahedya matapos na mamatay ang lalaki habang sinisikap na sagipin ang kanyang kasintahan na nalulunod sa ilog ng Barangay Matictic, bayan ng Norzagaray, Bulacan kamakalawa ng hapon. Hindi na umabot pa ng buhay sa Norzagaray Hospital ang biktimang si Ricarte Cosinillo, 29, ng Sitio Pogpog, Brgy. Poblacion. Ayon kay PO2 Dennis Silo, dinayo ng biktima at kasintahan nitong si Aira Mina Yambao kasama ang ilang kaibigan ang Matictic River sa Sitio Bakas. Habang naliligo ang babae ay tinangay ito ng malakas na agos sa ilalim ng ilog kung saan sinagip naman ng biktima subalit habang nasa pampang ay tinangay naman ng agos ang lalaki kaya tuluyang nalunod. Tumagal pa ng isang oras bago narekober ang bangkay ng biktima.