2 utas sa pananambang sa Zambo

MANILA, Philippines – Patay sa pananambang ang dating kapitan ng barangay at isang barangay tanod sa Pagadian City, Zamboanga del Sur, ayon sa mga pulis.

Nakilala ang mga biktima na sina Lowell Lalican, 48, dating kapitan ng barangay, at Calito Catadman, pinuno ng mga tanod, na kapwa residente ng Barangay Lison Valley, Pagadian City.

Bukod kina Lalican at Catadman, sugatan naman ang 15-anyos na dalagitang si Christine Mie.

Lumabas sa imbestigasyon na nanonood lamang sa telebisyon ang mga biktima nang paulanan ng bala ng mga hindi pa nakikilalang suspek bandang alas-10 ng gabi kagabi.

Patay agad sina Lalican at Catadman, habang isinugod sa Zamboanga del Sur Medical Center ang dalagita.

Narekober sa bahay ni Lalican ang mga basyo ng M16 at carbine rifles.

Inaalam pa ng mga imbestigador ang motibo sa likod ng pananambang.